حجات صغيره
في آيامه الاخيره
ومن اوله واخره كله حجات صغيره
حجات هنودعها لمده سنه
وكتير اوي راح توحشنا
كفايا بس براكتها
وقبل ما الهلال يطل
والشيطان من تاني يرجع
رمضان مش بس صيام وصلاه وعزايم
رمضان هنا بس كله تفاصيل صغيره
مش باينه لكن هتوحشنا اكتر
زي واقفتك ورجيلك لما توجعك
في الصلاه لما الامام يطول
وعينك الي بتغمض وتبقي خالص
مش قادر بس لازم تستني تتسحر
عشان فعلا مش هتعرف تنام وتقوم
وخوفك انك تنام تجوع او تعطش
ولا المذاكره وعدم تظبيط الوقت
والخوف والقلق من قله النوم
او لما كله ينام وانت بس الي صاحي
عشان كلها ساعتين ونازل الامتحان
ده غير ان في ناس كتير
من جيران وصحاب بس بنشوفها
في رمضان وقت الصلاه
غير نزولك عشان تكمل لبسك
ما هو اصل لبس العيد فرحه تانيه
ولفك في الشوارع و زحمتها
والدوره الرمضانيه الي ماليا الشوارع
يستحيل حتي تنيمك عشان
ميفوتكش ماتش ويا صحابك
وغير مهمه البيت وغسيل السجاد
وعراك كل يوم مين هيغسل مواعين الفطار ومين عليه تحضير السحور
ومسح العفش وتنضيفه العيد الحلوه
والاحلي عندي هو عمايل روايح زمان
جوه البيوت ودفها يعني ريحه الكعك
والبسكويت من إيد ماما طبعا
والقاعده قصاد سخونيه الفرن
عشان تعب ماما ميروحش ويتحرق
وشراء الخضار وخزين البيت
عشان في العيد الناس أجازه
ويوم الوقفه بحلاوتها دي حاجه تانيه
ملهاش اي وصف عندي
غير انه احلي ايام السنه بوجود
ناسها وحبيبها وضحكه صحابنا
كل ده واكتر كتير في رمضان وايامه
ومش هنسي صاحب الفضل
عمو المسحراتي ولحد دلوقتي
بقولك امته هتقول أسمي
كل الشكر ليك ولوقفتك قصاد طبلتك
عشان بس تفكرنا وتصحينا
بس خلاص مفيش تصحينا
احنا خلاص كبرنا بس ابدا
مش هنكبر علي سماع صوتك
ووجودك كل سنه نعمه في رمضان
احنا بس مش روحنا في رمضان متعلقه لاء دي متكلبشه
في كل تفصيله صغيره منسيه
بنودعها وبنقولها والله ليكي
وحشه ياريت بجد متسبناش
كفايا نور الشوارع والبيوت بالزينه
والامان في كل حته
وطلت الملايكه وجمالها برمضان
كفايا بس الاهم اننا بس مسلمين
AyaElmasry📝📝
©ayaayman
A