واشيـب عيـنـي مابـقـى بالجـسـم حـيـل
ولابـــــقـــــى بــالــعـــيـــن دمــــــــــعٍ تـــهـــلــــه
ولابـقــى عـــزمٍ يـسـاعـد عـلــى الـشـيــل
عـــزمــــي تــــــــردى والــخــفــايــف تــفـــلـــه
ولابــقـــى وقــــــتٍ نـــعـــدل بــــــه الــمــيــل
والـنــفــس صـــــارت كـــــل شـــــيٍ تــمــلــه
صـــارت تـمــل مـــن الـسـهـر والتعـالـيـل
وتـمـل مــن شــوف الـرمـوش المـظـلـه
ومــاعـــاد تـبــغــى لابـــســـات الـخـلاخــيــل
ولاعـــاد لـــه خـلــقٍ عــلــى شــــوف خــلــه
ولاعـاد لـه خلـقٍ عـلـى الـقـال والقـيـل
مـــلــــت ســوالـــيـــف الـمـخــالــيــق كــــلــــه
ولاعـاد لــه كـيـفٍ عـلـى الـبـن والهـيـل
ولاتشـتـهـي قـــرصٍ عــلــى جــــال مــلــه
ولاعــــاد يعـجـبـهـا الـسـفــر والـتـراحـيـل
امــــن الــوهــن صـــــارت تــحـــب الأظــلـــه
امــن اولٍ تـسـري عـلـى النـجـم بالـلـيـل
ومــــافــــيــــه دربٍ بــــالــــخـــــلا مــــاتــــدلـــــه
واليوم ماتشفق على شوفة السيل
حـــتــــى ولا شـــــــوف الــربـــيـــع بــمــحــلــه
لـولا الأمـل فــي مابـقـى مــن مقابـيـل
مـــلــــت مـــــــن الــدنـــيـــا بــــدقــــه وجــــلــــه
ولــــولا صــــلاة الـفـجــر بــيــن الـرجـاجـيـل
تـصـيــر دنــيـــا الـنــفــس ســـــودا مـمــلــه
مـــالـــوم نـــفـــسٍ عـذبــتــهــا الـغــرابــيــل
دنــــيــــا تـقـلــبــهــا عــــلــــى كـــــــــل مــــلـــــه
تـلــوعــهــا الــدنــيـــا بــكــثـــر الـبــهــاذيــل
والـنـفـس مـاتـقـوى عـلــى الـظـيـم لله
يـــارب صـبـرهـا عــلــى الـظـلــم والــويــل
يالله طــلــبــتـــك كـــــــــل عــــقـــــدٍ تـــحـــلــــه
يـــــــارب وفــقــنـــا لــــــــدرب الـتـســاهــيــل
يــــــــارب خــــــــل نــفــوســنـــا مـســفــهــلــه
يالله بحـسـن الخاتـمـه لاوفــى الـكـيـل
يـامـحـصـي احــســاب الـفـلــك والاهــلــه
ألا بـــــذكــــــر الله وكـــــثــــــر الــتــهــالـــيـــل
تـسـلـى الـنـفـوس وتنـجـلـي كـــل عــلــه
©zam
Z