رسمتك والمطر غنه
اعله كل شباچ صفنة ماي
ورسمت الطيف حنة شمس لعيونك
وفز رمشك وطوله افياي
تره اجدامك هوه ابلا راي
طفه وجهك گمر والغبشه ترس البال
اجيتك هندس امرايه
ومن شفتك كحل واعيونهم خرسه
لضمت اسوالفي بطولك
وغازلتك دفو احچاية
ومشه بيه شلب خصرك لوجه الهور
والگيت البلم خدران يم عينك
والگيت النوارس والجرف والماي
كلها اتسولف ابطينك
واشتلت العيون وسچة اجفوني
لـ مشابگ ريل
حتى ايصد حمد طيفك
اثاري الآه البروحي ذنب مخمور
بس تستغفر بكيفك
يصيت الفيض اشو نشفن مواعيدك
ياطيفي الگلادة اتموت
اذا ما والفت جيدك
ياشوگي العطر بالعيد
مامرغوب اذا ماشم مراجيحك
ياگمره الوطن احنه
گتلك والنجوم اتضيع اذا طحنه
لاگيني عرس بيبان
اسامر كل سواجييك وازفلهن نهر حنه
واطش لرسوم كل موعد ضحك شباچ
ومشاور سوالف شوگ معگودة باصابعنه
ذكرتك وانچفه بروحي سلف دخان
بفراگك بياض العندي بس الشيب والنيه
حمامة برد بضلوعي ولاچنك
فخاتي ازغار غرگانة ابدفو ابنيه
وهذا انه
كلشي اياي ظل سهران
الدمع باليل يتسمه مطر نعسان
مرلي وخل نلم ارواحنه ونوگف شذر عرسان
وعفت كلشي
ولگيت الشعر بمتاعي
شردت من القهر لولاية الضحكة
اريد ارتاح
الحزن بس بالشعر ينلاح
©rtfwjciojc
R