أكيـد باكر أكيـد راجعين
وعلى أمل الرجوع عايشين
من الشفناهو والعشناهو
بقينــا الليــلة ما حاسيـن
🔴🔴🔴
مرقنا قبل نوادع الناس
ولا عارفين نقبل وين
وكل الشلنا في شنطة
وكيساً فيه بس توبين
كان العشــم نرجــــع
والعيـد يكـون عيدين
ما الزول البفوت بيتو
يمسي عمرو كلو حزين
🔴🔴🔴
شلنا خطانا من البيت
وفضلنا على الوجع صابرين
سبنا عمرنا في الحيطان
صور عشناها مبتسمين
ما ودت خطانا دروب
إلا وكنا أخوة متلمين
منو القال البعاد بحصل
ونتفرق ما نكون قاعدين
🔴🔴🔴
و ما بيـن هناك وهنـا
لاقينا السمح والشين
مرة يقولو ديل ضيوف
ومرة يقولو ديل نازحين
ناساً زادت همومنا هموم
وبرضو لقينا ناس طيبين
عشنا بعيد مع الحسرة
والفقدناهم كتـار غالين
🔴🔴🔴
ناس فاتوا الوطن كلو
ضاقوا المر هناك مرين
أخوك هناك و إنت هنا
وكل همك تلاقي متين
صبحنا بي أمر الحرب أشتات
في كم حتة منتشرين
ما قادرين نلاقي بعض
ولا حتى الصبر قادرين
🔴🔴🔴
والزاد الوجــع أضعاف
ناس عرفة سنين وسنين
خانوا العشرة والجيرة
وفي حسراتنا متعاونين
ربنا يصلح الأحوال
نكون برعايتو محفوظين
عشمنا في الله ينصرنا
ولينا في القواسي يعين
✒️
*محجوب عبدالله السيد*
©mahjoub
M