تـغـيـرت كـل الـســلــوم الـقـديـمـه
كثر الحكي فالناس من غير داعي
النـاس تـرغـب من يجيب النميمه
حتى النفاق اصبح ذكاء اجتماعي
بعض الـسـوالـف عـاقبتـها وخيمه
ياللي بثرثرتـك ورى الناس ساعي
تنقد تبى الـشـهـره وتبـغى الغنيمه
غـرُّوك نـاسٍ تـحـت رايـك تـراعي
ما تدري ان هرجك يذب الخريمه
وانا كـذا طـبـعـي بـعـيد ارتـفـاعي
ان ذمـنـي نـاقــد بـعـقـل البــهيمه
فـ المهـمـلات اسجل اسمـه رباعي
عنـدي على فـن التجـاهـل عزيمه
عن كل ساقـط بالـوشـاه اندفاعي
ياللي تـذم اهل العـقـول الـفـهيمه
اهوايـتـك ما تجني الا الضـيـاعي
ان طـال مشـوارك تـذوق الـهزيمه
لـكـن طـعـنـي مــد كــف الـوداعي
جنّب عن امواج البحـار العظـيمه
ما كل حين فجوج دربك وساعي
دام السـفـينـه عـادهـا مستـقـيمه
بـعـد الـتأرجح ما يـفـيد الشراعي
لو المـطـر مضمـون فـي كل غيمه
مـا تـعـبو الـبدوان لـ اجل المراعي
©ابوعزيزه
ا