🌸 🌸 🌸
يا قلبي مالُن ؟!
البُعاد والشُّوق منالُن
إنت تشقى عشان عيونُنْ
وفي شقاك المُرْ حلالُن
🌸 🌸 🌸
يا قلبي مالُن ؟!
شنو الغير أحوالن
نسوك ولا إتناسو
ولا انشغل بالن ؟
🌸 🌸 🌸
وأنا الكنت قايل
يبقولي وأبقالن
ناساً مني بقيتن
وما حبيت بدالن
🌸 🌸 🌸
عذابي راضيهو
لو هو يحلالُن
فوق ناري بتوطى
عاشق لي خيالُن
🌸 🌸 🌸
آه أنا من عيونن
الما شُفْ مثالن
يجرحن وما بكتلن
بي رمية نبالن
🌸 🌸 🌸
جمالاً فطري شفتو
معطون في جمالن
مزروع الطبيعة
الشارب زلالن
🌸 🌸 🌸
مهما يسوو فيني
بتحمل دلالُن
عشمان بكره يوعوا
ويرجعو لي وصالُن
🌸 🌸 🌸
يا قلبي حدك وين
واقف على أطلالن
ما قنعت من ريدن
لسه تغني موالن
🌸 🌸 🌸
✍️ محجوب عبدالله السيد
الجزيرة 26/يونيو/2023م
©mahjoub
M