👏বিদায় 👏

ডিচেম্বৰ জানুৱাৰী মুখামুখি খুব
এবছৰ অতিক্ৰমে যাৰ বাট বহুদূৰ ,
গছে পাত সলাই মানুহ সলাই ৰূপ
প্ৰকৃতিৰ এয়াই নিয়ম...
এৰি অহা দিনবোৰেই স্মৃতিৰ বালিস্তূপ।
পোৱাই হাঁহিলে হেৰুৱাই কান্দিলে
বুকুত জ্বলাই সকলোৱে
এগছি আশাৰ বন্তি
সময় চলিব নিজস্বতাৰে
জীৱনৰ সৰ্পিল বাটত খোজ আকৌ
অন্বেষণ এটি নতুন পুৱাৰ।
কন্যাক বিদায় দিয়া কিম্বা বৰণ কৰাতকৈ
যেন অধিক উন্মাদনা,
ডিচেম্বৰ একত্ৰিশ মহাৰাত্ৰি
আয়োজন নৱবৰ্ষৰ আদৰণি আনন্দোল্লাস
নানা ৰং ফেষ্টুন বেলুনে হ'ব কেকত কলমত্ৰাস!
কাৰোবাৰ চোতাল ৰঙীন হ'ব
উৰিব ধোঁৱা চিতাত
বনভোজ স্ফুৰ্তিৰ ৰং হ'ব পাৰে
কোনোবা আইৰ চকুলো টোপাল।
হে পুৰণি বৰ্ষ..!
তুমিতো নাহিবা দুনাই
কুঁৱলীৰ আচ্ছাদন ফালি যিদৰে
বেলিটিয়ে হাঁহে
নতুনক কৈ যাবাহি
তোমাৰ বুকুত পোৱা আঘাতবোৰ যেন
কোনেও নাপায় নুপুহাই।
সুখক নিমন্ত্ৰণে তুমি যোৱা দুখী মনে
অশ্ৰুসিক্ত নয়নে....
তোমাক জনালোঁ বিদায়।।

🖋️আব্দুল মজিদ
নলবাৰী
©AbdulMazid