🌹 बुक्का 🌹Page no-1

एक दमदार,मजबूत बुक्का हाणावा,
या दगडी पर्वताच्या छाताडावर,
परंतु, मत्सराच्या ज्वाळेत पेटलेली,
पाचही बोटे चालली, वेगवेगळ्या वाटेवर,
दिशाहीन आपल्याच धुंदीत,
हे झालेच नाही कधी, एक मुठ,
मनी ठेवून, सुडाग्नीचा ध्यास,
तर मग मायेचा,ममतेचा, नी समतेचा,
कसा भरवतील एकमेकांस घास?
आणि हा एक बोट, ठेवून आंधळा विश्वास,
नकार देतो करंगळीस,सोबत करण्यास,
मधले बोट मात्र,मध्यम मार्गावरच चाले,
जितका डावीकडे,तितकाच उजवीकडे धावे,
आणि तो बोट,ज्याने दिशा ठरविली अस्मितेची,
एकटाच आहे उभा, बनुन हिम्मत अंगठ्याची,
आणि अतोनात प्रयत्न करतोय, होरपळलेला अंगठा,
खाक झालेल्या राखेतून, ठिणगी पेटविण्याचा,
जर स्वप्नरंजनातील,क्रांती घडवायची असेल,
तर सगळ्या बोटांना, एकत्र यावेच लागेल बलदंडावर,
तेव्हाच,
एक दमदार, मजबूत, बुक्का हाणाता येईल,
या दगडी पर्वताच्या छाताडावर...
🥀अभय ना.ताकसांडे🥀
©abhayt