आंनि गोदोनि जोनोम गामि

अखा नायसि नायसि फेरेंसु दाव गाबोला
आबै गुग्रिया लान्थिमोदोमाव थांगा जि जोमना
गुजुख्रेब गुजुख्रेब बन्थ' मुरासिनख्लाबनायजों
गुजुन्दा अर सुखां- सुखां अर जरायना
हान्दि गिदिराव हान्दिसे सा फुदुंना-।
ख्रुब-ख्राब सानाय देहाखौ फोरानानै
आबौआ लासैयै आबैजों अर सायफानाय
दाहोना फोरखौ माइ नानो , रूवाथि गेन्द्रिखौ माइ सौवनो फोजा फोजा गुजुन्दा अरनिफ्राय उखुन्दै खुफबलायनाय
बिरि खान्दायाव खुगाजों अर बोनाय खुरैसे संख्रि
सा लोंना मोदोम फुदुंनाय। है- हा मोसौ होनाय दुम दाम
माइ सौनाय सोदोबाव आं सिरि मोनखांदोमोन,
दान्दिसे उनावन आगै सना याबो गाबखांदोंमोन,
हाबाब! सोरांस्लाब मोनै बेसे मुखुबमोन
दाहोना, रूवाथि आबै-आबौ नखरनि बयबो
सोरांनाय लोगो लोगो माइ नाखांनाय माइ सौखांनाय,
सोरांथारब्ला लाय लाफानि बारि एवनाय
ओंखाम गोजां जाखांनानै आबौआ
खुदब सिनस्रि खौ लानानै फाबनाखंआव साथा
आखायाव लावथि, जान्जियाव सिखा फिसा
ग'लि गंसे मोसौ खौ लावखार मुत्राजों एै फाख्रि एै ब'गा
बुंङै बुङै लामा गोमफब लायनाय मोसौ लांनाय,
दैज्लां सफैफिनब्ला दुब्लि बारियाव
हरनि ओंखाम सोमनायखौ रूवाथि गेन्द्रिया आयजों
जान्जियाव दैहु बिखुंआव थोरसि बाना
खर' खावखानाय जि खानायाव गय खान्दिलाना
गाहेन गुहेनै दुब्लियाव ओंखाम हैनाय ।
ज' ज' जाजाय हाल सावरि माइ बदल गायनाय
आलि ख'ना ख'ना ना गुरनाय ,
मेंनाय देहायाव आबौआ ओंखाम माइदि लोंना
देहाखौ थाजिम खालामनाय,
अनला खारियाव ना गारस'ना जानाया दिनै आरो गैलिआ-।
आबौआ थैलांबाय आबैआबो थैलांबाय बिसोरनि गोथै हाथ'फ्ल बायदिनो बर नि आसार खान्थिजों दाफ'बनाय
बै.... ग्रोम ग्रोम गामिया दिनै गोमा लांबाय
गोदान मुगानि गोदान आदब खायदाजों
मन'ग्लाब जालांबाय ।

- सांग्रिलि बर
©Sudem boro